صدام حسين ارجع مو كتلنه القهر
بقلم: مواطن عراقي
دتعال ارجع .. والله حتى عمار الحكيم ينتخبك ..
ابو عدي طلعنا غلطانين .. قشمرونة بالديمقراطية ..
ياعمي انطرحنا زواج
ابرينه الذمة سبيناك …
بس ارجع ….
اه ..
ارجع بداعت ميشيل عفلق … 
هيج ويطلع حلم وذولة الحرامية الفشلة ميحكمونا بعد .. ؟!
ارجع ابو الليثين حتى لو يوم واحد … وثاني يوم اعدمني بساحة الطيران … سيدي نقبل بالدكتاتورية بس ترجعلنا بلدنا العظيم وهيبتنا وسمعتنا الطيبة بين العربان.
ابو عدي والحمزة ابو حزامين …الفساد صار عادي مثل علج بوبي ..
ابو عدي ولدنا لحم اطشروا بالمفخخات والعبوات
ابو عدي الارامل والايتام صاروا عشر اضعاف حربك ويا ايران ..
ابو عدي :
المي خصخصوه , والكهرباء خصخصوها , الينام ويا مرته يدفع خصخصة .. من كون لطمة بيهم ,
ابو عدي: عليك الله بس ارجع حتى لو بس دعاية…
ابو الغيرة
گام الحافي هو الي يحكم بلدنا اليوم , والعرضه صگط شايل سلاحه بالشارع ومحد يكدر يوكف بوجهه … واللي وكعت قطرة الغيرة من جبينهم كاموا يلبسون عمايم وعكل ..
ابو عدي:
تعال يومية نطب حرب وياك .. يادولة تغثك .. سويلنا تاك الها واحنه نحتلها ومايهمنا الي يحجي ويانا بعد …
بس ارجع …. عليك العباس ابو فاضل
هسه ولدنا تقاتل .. والدولة تبيع بيهم يومية بايعة فوج لو لواء ..
لك فدوه ارجع والغي الستلايت والموبايل.. ورجعها قناة وحده واطلع بيها وحدك ٢٤ ساعة … شبيه التلفون الارضي ابو الهندر …
ارجع والله تماثيلك نرجع نلزكهن …
ارجع سيدي مو حتى قصورك كعدو بيها الخايسين … والساقطين
بس انته الدوه لهذا الشعب ، هسه يالله عرفنا قدرك ومكانتك .
عمي ابو عدي … تعال ارجع حتى لو تسوي الگاع كلها سجون ..
ابشرك العراقيين كلهم صاروا حشاشة والمخدرات اللي جنا نسمع بيهه , هسه گمنه نشوفها تنباع مثل الجكاير بالشارع .
سيدي بهذلونه والله وبعد مانعرف الدنيا ليل لو نهار من كثر التفجيرات … تصور حتى المطي فخخوه ..
سيدي لاتصدق هذولة الحرامية اللي يكولون جماعتك هم سبب خراب العراق ….
.. الجماعة طلعوا الشعب هو المجرم وسبب الفساد والدمار
ابشرك يالغالي … اذا فازت الريال 2% من الشعب يصبحون مجاتيل
واذا فازت برشلونه يحترك العراق ودول الجوار من كثر الطك…
ابو عدي ارجع والغي النت ..
رجعنا عالارضي بروح امك ..
ابو عدي .. تسمعني .. ؟؟؟؟!!!!!!
الوووووو ….
الوووووو …
ADVERTISEMENT
ADVERTISEMENT
