” جلد الدجاجة علينا ارحم ” من سطوة السياسيين
بقلم: سارية العمري
أكو واحد يگول : چانت آمي تطبخ الدجاجة وتخليهه گدام بيبيتي حتى هيه توزعها علینا بالتساوي ، لأن بيبيتي حقانية و تخاف الله رايحة للحج مرتين و ٤ مرات رايحة عمره و تگعد من الصبح تصلي الفجر و كل صلاة بأوقاتها … المهم بيبيتي تاخذ الدجاجة و تغطيها بالخبز حتى محد يشوفها وتاخذ گرصه خبز وتترسها خضروات وتمد أيدها للدجاجة وتثلم شويه من الجلد و تلفها بخبزه چبيره و تترسها خضروات و خيار حتى تكبر اللفه وتنطيها لواحد من عدنه وتگله روح هناك ليشوفوك أخوتك !!!
وعلى هالرنة طحينك ناعم ، كل واحد من عدنه ياخذ نفس حصته من جلد الدجاجة ، الى ان تگومنه كلنا ،، وتبقى بيبيتي وحدها تاكل الدجاجة كلها … بعد فترة طويلة من هذا الظلم الاسري الذي قادته بيبيتي ، رحلت صاحبة العدالة والقسمة الحقانية الى دار الاخرة ، وبرحيلها الرباني عرفنه الدجاجه بيها ( فخذ و صدر وجناحات ) !!! و بيبيتي الله يرحمها جانت مقشمرتنا بس بالجلد !!!
ربـاطـ الـسـالـفـه* هسه ما أدري شوكت يموتون السياسين و البرلمانيين حتى نعرف موازنة البلد وين دتروح !!! لان الفساد معشعش بالمنطقة ( الغبراء ) من اعلى الهرم حتى اسفله ومن طلع الشعب يطالب بحقوقة الدستورية ، قطعوا عنه خدمات الانترنيت واعتبروا المتظاهرين من بقايا ( البعث ) او الدواعش … والمصيبة اذا هذا الشعب المنتفض كلهم من بقايا البعث والدواعش معناها ان هؤلاء المتظاهرين هم على حق والسياسيين على باطل …. والطامة الكبرى ان تنظيم داعش يصول ويجول ثلاث سنوات في الموصل وحكومة المنطقة الخضراء لم تقطع عنهم خدمة الانترنيت
لو باقين على بيبيتي هووووووايه أحسن … اشو ذوله الجماعة يبسوها فد نوب و حتى جلد الدجاجة ماشفناه بالعكس نزعو حتى جلدنا !!! الله يرحمچ بيبیتي طلعتي هوايه أرحم من الأحزاب السیاسية..
