مقالة ساخرة ” الساسة لصوص العراق ”
بقلم: سارية العمري
اكو فد واحد معمم دخل على محل ذهب ، الصايغ استقبله بكل ادب وگله اتفضل سيدنا .. دخل السيد وعرف نفسه للصايغ بانه ( المهدي صاحب الزمان ) .. ضحك الصايغ وگله گول غيرها سيدنا صح أنته لابس عمامة رسول الله ووجهك نوراني بس الأمام ما يظهر لمثلي .. بهل الأثناء دخلت مرة ورجال يشترون ذهب وأختاروا قطعة ذهب گاللهم الصايغ تفضلوا أستريحوا لحد ما أوزن القطعة ، فتفاجأ بالمرأة كعدت بحضن السيد گللها الصايغ : وين گعدتي بحضن السيد ؟؟ جاوبته بأستغراب : يا سيد ؟؟ وينه ؟؟ شنو شبيك أخي شو انت موطبيعي ؟؟ تبيعلنه لو نروح ؟؟ !! سكت الصايغ ووزن قطعة الذهب ونطوه المبلغ وراحوا ..
گله السيد أبني تره بس أنته تشوفني وباقى الناس مايشوفوني ، بهاي الأثناء دخلت عائلة ثانية وصار نفس الموقف الي صار ويه العائلة الي قبلها .. بقى صاحبنا الصايغ حاير ، گله السيد أبني آني ما محتاج منك شي وآني ما أظهر لكل واحد ألا للخواص … تفضل أخذ هاي قطعة القماش وأمسح بيها وجهك حتى يزيد رزقك .. الصايغ ماجذب خبر ، أخذ قطعة القماش بكل قدسية وباسها وشمها ومسح بيها وجهه ، ثواني الصايغ وكع خدران مغمى عليه .. السيد لملم الذهب كله والفلوس وكنس المحل كنس وطلع .. بعد فترة قصيرة ، وأذا بسيارة شرطة جايبين السيد مكلبچ يم الصايغ ، ضابط التحقيق گال للصايغ عندنا كشف دلالة لواقعة السرقة التي حصلت بمحلك … الضابط وزع القوة المسلحة وگال للسيد هذا محل الصايغ أشرحلنه شلون سرقته .. السيد بدأ يشرح الواقعة كالتالي :
سيدي دخلت عالصايغ وگعدت هنا وگتله آني المهدي وشرح كل القصة لحد ما وصل لقطعة القماش فالضابط گله شلون يله مثلولي ، كام الصايغ وكف مقابيل السيد وأنطوه قطعة القماش وخلاها بوجه الصايغ وچان الصايغ يوگع مغمي عليه .. الجماعة هم لملموا الذهب والفلوس وكنسوا المحل كنس وطفروا ..
رباط السالفة .. أحنه بالعراق حالنه حال الصايغ بكل مرة قبل الأنتخابات يجون السياسيين يحجون كم حجاية ويقشمرون عالناس بالبطانيات والصوبات والوعود الكذابة والناس تنتخبهم مرة ثانية ، وهم على علم ويقين ان هؤلاء هم سبب خراب ودمار العراق وانهم سرقوا خيراته ” كنسوا العراق كنس “وعلى هالرنه طحينج ناعم ….
اكو مصطلح اقتصادي يطلق عليه ( الانهيار الاقتصادي ) وحقيقة الامر ، انه ليس عجزا في الفلوس وانما فائضا في اللصوص …. نسخة منه الى الساسة لصوص العراق ” شلع قلع ”
” السالفة بيها ربّاط” من خلال هذا النموذج
