الله يرحم نجم عبد عذاب سولفلي سالفة وگال سنة 83 چنت جندي وصنفي سايق بالجيش وبهذاك اليوم صار علينه هجوم ايراني قوي بمنطقة الفكة بالعماره وصار قصف المدفعية الثقيلة يشوت ويطيح بالخلفي وبذيج الفتره چانت الحكومة تاخذ اللوريات صخرة تحمل عتاد وصواريخ وبالگوه من الأهالي المدنيين وغصبا على أبو اللوري يوصل للجبهة تحت عنوان المجهود الحربي،،،،
يگول احنه لابدين بالخنادق والشقوق الأرضية خايفين من القصف لان القذيفه تجي تون وتصيح نجف نجف نجف يعني موت مابيها يمه ارحميني.
وبين مااحنه لابدين اجه مارسيدس اقجم سكس ويل مفرغ عتاد بالمتقدم وراجع ولما وصل شويه عنا ولن قذيفة 105 ملم طاحت وراه وملخت بدي اللوري والتايرات ثمانيتهن الوره طگن والسايق نزل مرعوب مايعرف وين يلبد لان الگاع مكشوفة ، يگول نجم الله يرحمه صحت عليه طفي السياره وتعال بسرعه لا تموت
يگول اجه يركض المسكين وينفت لان ماشايف قصف وچان بحدود عمر 22 سنة ولابس دشداشة دليمية ولاف يشماغ أحمر على راسه گتله لاتخاف وهسه الله يفرجها گال أخاف ع السياره خاف تحترگ وابوي يذبحني لان عزيزة علينا وعيشتنا بيها.
گتله وين أهلك ، گال بالرمادي ، جاوبوه ، لا تخاف واحنه عمامك اني سماوتلي وهذا بصراوي وذاك حلاوي
وگاعد انهدي بي واچت القذيفه تصوفر واحنه ياعلي ياعلي ياعلي وهوه من خوفه المسكين هم صاح ويانه ياعلي،،،،
انتهى القصف وصار الليل وابن الرمادي مرعوب لان ماشايف طبيعة المعارك .
يگول نجم الله يرحمه ، گتله الصباح رباح وطلعنا طماطه وبتيته وسوينه عشه ونام يمنه ابن الرمادي ، ومن الفجر غبشت لمساعد امر السريه وسولفت السالفة وگتله سيدي هذا من الرمادي وهيج صار بي ، جاوبني مساعد امر السرية ماعدنه تايرات منين نجيبله
گتله سيدي عدنا مستعملات انطيني امر اخذهن، گال روح نجم انت مخول ، شوف شغلك وسوي اليعجبك
يگول طلعت اللاندكروز وحملت التايرات ورحت للسياره فتحت التايرات المضروبات وأخذت الويلات والسفايف ونزلت لأقرب بنجرجي وسويتهن ورجعت شديتهن وابن الرمادي اجه گال عمي خلي اعاونك گتله روح اتريگ معليك،،،،
كملت وخميت الدهن والماي وشغلت حتى الهوه يصعد ورجعت گتله يلا عمي توكل وروح لاهلك،،،،
تشكر هواي من عدنه وگال عمي هذه رقم تلفون بيتنه بالرمادي خاف فد يوم عندك شغله بالرمادي تصير بس اتصل بينا،،،
راحت سنين وردت سنين ، يگول نجم من أنزل باجازه اشتغل بالاجازه بسياره أبو سعد الله يرحمه وبذلك اليوم حملنه أربع سكسات غنم للرطبه وصارت عجه قوية وتيهت ربعي ونزلت على سيطرة مال الأمن الخاص ولزموني بحجة تهريب الأغنام وذولاك مايتفاهمون بسرعه للأمن الاقتصادي وحولوني لمركز شرطة الرمادي والأوراق يردون يحولوها للقاضي وباجر المحكمة وراح انحكم أقل شي خمس سنوات والسيارة تصادر مابيها كل مجال،،،
يگول نجم الله يرحمه العصر بالسجن گاعد وانخه أم البنين سلام الله عليها وذكرت أبو الرمادي النقذته قبل 4 سنوات واطلع المحفظة وادور بالأرقام ولگيت الرقم ، گلت للحرس أبو الغيره بس أريد اتصل رحمه لوالديك ، الحرس اتصل برقم التلفون الأرضي وحصلهم
وخبرهم اكو واحد يمي يريد يحجي معاكم ، عرفت بنفسي و كلي انته وين هسه ، بس سمعت كلمة واحدة … احنه جاينك،،،
يگول نجم بقيت اسولف وي الحرس بحدود ربع ساعه ولن تطبگ مارسيدس تورن وتنزل الزلم ركض شي لابسه غتر وعگل وشي افنديه وشي لابسه زيتوني
وذاك الشاب ابن الرمادي الخلصته من الموت شبگني وكلهم باسوني ولما اجه ضابط المركز تعجب منين أعرفهم لان وياهم واحد برتبة لواء متقاعد خال الولد الي اتصلت بيه ، وكل شويه طابگه سياره وانگلب المركز عليه،،،،
الأوراق شگگهها الضابط من سمع احساني وي ابن ولايتهم وطلعو السياره بحملها واخذوني للبيت وذيج العزوبية وابات يمهم ذيج الليلة وكل عمامهم اجو ، كاللهم هوه هذا السماوتلي الي خلصني بذيج الشدة ، وجميله ماينسي وصار الصبح وحطوا كدامي ذاك الريوك وحطوا غراض بالسياره وگالو هاي هدية لاهلك والولد انطاني جيس وگال عليك الله لاتفتحه لما توصل لاهلك لان هذه الجيس بي هديه من امي
ولما وصلت يگول نجم لگيت بالجيس 150 دينار وشكبرها بذاك الوكت
الله يرحم نجم أبو علي ويرحم كل الناس الطيبة
كلي…ياعراق..جاه…شجاهها الناس اتغيرت
وانت بقيت ذاك انت…شامخ
احبك ياعراق….احبك يااحلى وطن
