سالفة_ورباط ..!
بقلم: سارية العمري
يحكى ان رجلا فقيرا كان يعمل سائقا على احدى سيارات الاجرة القديمة ( تاكسي ) ، وكل عيشته عليها ، المشكلة في الموضوع ان هذا السائق الفقير ماعنده گراج بالبيت حتى يخلي السيارة بيها ، لذلك يضطر يخليها بالباب ، وصاحبنا يضل الليل كله گاعد يحرسهه ، ومن يطلع الصبح للشغل جماعته السواق يشوفوه نعسان ويتثاوب كل الوكت .
واحد من السواق القريبين عليه والي يعتبره احد اصدقاءه ، كله شنو مشكلتك ليش عيونك حمر وبس تثاوب شنو ماتشبع نوم بالبيت ، جاوبه اخونه الفقير كله لا والله ما اشبع نوم ابد ، لان كل الليل ابقى سهران احرس السيارة ، صديقه الذكي كله سهلة عندي حل لمشكلتك … فنصحه يشتري چلب ويربطه يم السيارة حتى يحرسها ، وصاحبنا نوم ، السائق الفقير عجبته الفكرة وقرر يروح للعرب ويأخذ چلب من صديقه … وفعلا تحقق لهذا السائق مطلبه واعطاه صديقة احد الجلاب الي عنده ، وجابه وربطه يم السيارة مالته ، ونام الليل والصبح شغل سيارته وطلع على باب الله وشكر صديقه على هاي الفكرة .
وگام كل يوم ينام من وكت ويشبع نوم ، وره اسبوع گعد اخونا السائق الفقير الصبح لگه ايده والكاع … السيارة مالته ماكو ..!! اتخبل وراح اشتكه يم الشرطة ، فـ اجه المحقق وياه يعاين مكان الجريمه ، انتبه المحقق عالچلب وسأل أبو السائق المنكوب ، گاله هذا الچلب مالتك ..؟ گاله اي مالتي ، المحقق گاله انته اللي مربيه من هو صغير ..؟ گاله لا اعطانياه صديقي من العرب الفلانيين ، وره يومين المحقق دز على السائق وگاله لگينه سيارتك عند فلان اللي اعطاك الچلب ..!! لأن من اجه يريد يبوگ سيارتك الچلب مانبح عليه لأن هو اللي مربيه فأخذ سيارتك ..!!
المحقق نصح سائق التاكسي وكله … اخذلك چلب صغير وربيه حتى ” إنتمائه وولائه ” يصير الك ..!! مو تاخذ چلب إنتمائه الك وولائه لغيرك ..!!!!!!!
رباط السالفة … يبطبق على شعبنا المسكين اللي يحكمهم هذولة السياسيين الجدد الي عايشين طول عمرهم بالخارج وعنده اكثر من جنسية … شلون تريدون واحد مخلص عمره عايش خارج العراق وتريده يحرسك ويحميك ..؟
