” مقالة ساخرة من ارض الواقع “
بقلم: سارية العمري
اكو شيخ عشيره اسمه ابو جبار ، في احد الايام الشتاء القارص قرر ياخذ معاه واحد من الزلم في زيارة ليلية لاحدى العشائر ، الشيخ ورفيقه وصلوا العشيرة الثانية وتعللوا … ومابين سالفة وفنجان كهوة طولت الكعدة … المهم الجماعة قرروا يعاودون لمضارب عشيرتهم ، وبنص الدرب طگهم مشهاب برد ناشف .
الشيخ وصاحبه واحد يعاين بوجه الثاني … لابيهم يرجعون للعشيرة الي كانوا يتعللون يمهم ولا يگدرون يكملون مسيرتهم من شدة البرد والهوى بوجوهم. الشيخ گال لصاحبه ( ولك احنه اذا انكمل مشي راح نموت من البرد ) شوفلنا صرفة ؟ گاله محفوظ ماكو غير نروح على بيت عويد من عربنا ومزرعته جريبة علينه. الشيخ گاله هاي هيه. توكل بالله ، وصلوا الجماعة لبيت عويد ورحب بيهم وشعللهم النار وسوالهم چاي. ومن هفتت النار … گالوله عويد انريد انام .. .عندك فراش عندك غطا. ؟
گالهم لا والله ما عندي بس ازار ومتغطين بيها آنه والمرة والجهال.!! گاله الشيخ خوش روح نام . واحنه نلتف كلمن بهدومه. بنص الليل الشيخ گال للصاحبه. :.عيني ما تاخذ نوم من البرد صيح على هذا منعول الوالدين ما عنده بطانية زايدة لحيف ؟ صاحب الشيخ صاح على عويد … بويه ما عندك بطانية لحيف للشيخ. جاوبه عويد ، لا والله بس الازار ومتغطين بيه اني والعويل… الشيخ گاله ولك تشوف مناه مناه.. فعويد تذكر گاله محفوظ عندي اجلال المطي انطيك اياه. ؟ الشيخ گاله : انچب ولك . ارجع نام !! الشيخ والوياه ما گدروا ينامون والليل بعده طويل. هم رجع وصاح على عويد . وگاله: ولك دتذكر بلكي خطوية طايحة منا مناه نتغطى بيه من البرد . فعويد وهو حدر الازار صاح : لا والله محفوط بس اجلال المطي اجيبه الكم . الشيخ گاله انچب ولك . ورجع نام. فهو بينه وبين نفسه بوده يتغطى باجلال المطي بس خاف من عويد يسولف ويگول غطيت الشيخ باجلال المطي .
مرت فترة طويلة وهم ما گدر ينام .فصاح على عويد گله ولك تذكر بلكي تلگانه شي .!! عويد گاله محفوظ وداعتك ماكو غير اجلال المطي اجيبه ؟ فالشيخ طگت روحه وصار عصبي وگاله. ابن الجلب بدل اسمه وجيبه مو ذبحتنه !!! **
رباط السالفة … الانتخابات على الابواب ومفوضية الانتخابات غير المستقلة ، داخلة بالمحاصصة الحزبية .وقانون سانت ليغو فصلوه السياسيين على مقاسات الاحزاب . وتم تبديل اجلال المطي بالتحالفات الجديدة الي صارت . فما باقي على هذا الشعب المسكين غير يتغطى 4 سنوات قادمة تحت نفس اجلال المطي اجلكم الله….!!!
