بقلم: احمد مكية
بس لاتصير صدك ويرجع البعــــث وترجع الفرقة ، والمنظمــة ، والخفــارة ، ورفيـق أبو عراق ، والاشتـراك الشهري ، والجيــش الشعبي ، والسفاري ، والزيتوني ، وتحيـــــة نضالية ، وامـــــة عربية واحـــدة ، ووحدة حرية اشتراكية ..
أيبااااااه .. تتذكرون شســــوو بينه البعثيين ؟
تتذكرون المحاصصة مالتهم .. وهاي الوزارة للتكارتـة ، وذيچ المحافظة للدوريين ، وهاي الدائرة للبو ناصر ، وهذا الميناء لمزبان ، وذاك الرصيف لعبد الحسن راهـــي فرعون !!
تتذكـــــــــرون قصور وبساتين الجادرية اللي إستـــــــولى عليهه الرفاق الحزبييـــــــن ، وعشرات السيارات المصفحـــــــة اللي تمشــــــي وراهم وواحدهم بسوك الزلم مايسواله نعال لاستيك ؟
تتذكرون تجارة المخدرات اللي انتشـرت بوقتهم وعمليات تهريب النفط اللي چان يهربوه وتنزل عائداته بجيوبهم وجيب البعث الفاشي ؟ !
تتذكرون الميليشيات البعثيــــة شـ لعبـت بالبلـــد شاطي باطي بدواعي الدفاع عن صحابة رسول الله ومباديء الحـزب والثورة المجيدة. ؟
شننســـى من البعثيين وعمايلهم السودة ؟
ننسى استحواذهم عالوزارات وثروات البلد ومقدراتـــه ؟
لو ننسه المـولات ، والبنــوك ، والفنادق ، والمطاعم اللي بناهـــه رفاقهـم الحزبيين باموال السحت الحرام .. لو ننسى شســوو بالقضاء ، وشلون لعبوا بالتعليم طوبة .. لو ننسه الواقع الصحــي المزري اللي خلانه بذيل قائمة التصنيفات العالمية ..
لو ننسه عمالـــــة البعثييـــــــن ، وولائهم لدول الجــــــوار على حســاب بلدهم وناسهم .. لو ننسه فسادهم اللي رجع البلد للتكتــك ، والستوتة ، والدراجة .. لو ننسه حال العـــــــراق بعهدهم اللي صــــار فرجة لامـة لا اله الا الله .. لو ننسه المحافظات اللي صــــــارت بعهدهم تراب وأثر بعد عين بسبـــــــب سياستهم ورعونتهم .. لو ننســــه اضطهادهم للاقليات وتهجيرهم وســرقة املاكهم ؟ ..
لو ننسه البعثيين الحفــــاي اللي نسوانهم شبعن ع ي و… وبليلــــة ويوم صاروا إستاذ فلان ورفيــــق خريان ..
لو ننسه تقييدهم للحريات العامة ، وليش هاي تخلي حمرة ، وليش ذيج مالابسه عباية ، وليش هذا يشرب عرك ، وذاك يركص ويغني ؟
لو ننسه دفاعهم المستميت عن الأردن الشقيق و الســوري ميشيل عفلق اللي خلوله رمزية اكثر من رمزية النبـــي محمد ..
لا عيني لا ..
الله لايگولهــــه ويرجـــع البعــث .. خلونـــــه علـى هاي الوجوه الفليحة الموجوده هسه أقلها يفيدونه بعباداتنـه ، ويعلمونه شنگــــول اذا نفـوت للتواليت وشنگول اذا نطلع منه .. ويعلمونه شنــــو حكم الفسوة بالفقـه الاسلامي ، واللحم إذا نطبخه نسويه تكـه لو نسويه ( كبابا ) ، ويعلمونه دعـاء اذا نگولــــــــــه سبع مرات الله يسجل لكل واحد بينه سبع قصور بالجنة اللـــي مانشتـم ريحتهه الا ذولي يگودونه باديهم ونفــــوز معهم فـــــوزا” عظيما !!
إرجعلي زميلي المخرج ..
